أول كلامي الوطن....بقلم الشاعر / إسلام دهشان

أول كلامي الوطن
تاني كلامي الوطن
تالت كلامي الوطن
بس الوطن ما سمعش
سن القلم لو خف - فده رد فعل الرعش ،
مش كل ميت مات
ولا كل عايش عاش
جهز لي متر قماش
و افتح لي يلا النعش
..
تنهيد ، حديد ، اربع حيطان السجن
تعديد ، بصوت ، الامهات في الودن
تحديد مسار الخوف سلام
تكتيف حبال الصوت حرام
تسديد دراعك و إتجاهك فخ
هتصيب نصيب الجته قبل المخ
الصرخ بيهد الجبال بغناه
بس إستعن - بالله
..
( غني )
ردد بصوتك - انا م السلاح ماعييش
شاور بإيدك - اعمل علامة نصر
سبابة وسطى مرفعوين - من اجل نصرة مصر
إزحف على كتافك هتافك برضو بيرفرف
إشطف ف عينك م الغازات بالخل
إضرب برجلك زيهم في الارض
الشمس حتما مشتقاك هتهل
ماتقولش يسقط اي حد جبان
إهتف و قول إن انت اه انسان
إعلى بشهيقك و الزفير خليه
يطلع يزلزل اي ارض ميدان
..
( دندن )
موال في خيمة - يزيح في غيمة - وضحكتك سابقاك
هزر مع اصحابك اوي - يمكن تشيلهم عالكتاف بهتاف
وانت الدموع بتفر منك بس مش سايقاك
ولا حتى بتفكر تنخ ولا حتى بتفكر تخاف
..
ستف خطاك - واوعاك تكون في نطاق - نشان
علم مكانك بالرصيف - او اي باب دكان
احفر برجلك في الطريق علامات
وإن مات صديقك شربه ريقك يمكن يكون عطشان
..
الورد ند لنرد مش بيلف
خليك في اول صف
زي الصلاة ما تحب
الود رد البرد مش بيخف
خليكوا كتف ف كتف
واتساووا لجل الرب
..
و آخر مشهدين فيها هسيبهم لجل ما يشهد تراب الارض عالمشهد و زحف الكعب و صوت الرعب في صدورهم و قوة اجدع الشبان على نفس الزمان يا مكان على نفس المكان يا زمان و صوتي ينادي ‫#‏حرية‬ و نعمل كت و سطر الشعر فز و نط عشان ينطقها ثورية
‫#‏اسلام_دهشان‬